krea – Side 4 – Ísraelsmissiónin

Møtir við Jákup E. Petersen og Torben Mathiesen

29. februar – 6. mars fær Ísraelsmissiónin vitjan av Jákup E. Petersen og Torben Mathiesen.

Jákup er uppvaksin í Klaksvík. Hann býr í Keypmannahavn og er í løtuni í gongd við gudfrøðisútbúgving. Torben Mathiesen er í starvi sum landsskrivari hjá “Ordet og Israel” í Danmark.

Skráin hjá Jákupi E. Petersen:

Mikudagin 2. mars kl. 20
í KFUM og K í Klaksvík
Evni: Bókin hjá Zakarja

Fríggjadagin 4. mars kl. 20 í Sumba
Evni: Kallið til at venda umJákup fer eisini at vitja og undirvísa í PODAS kring landið.

Skráin hjá Torben Mathiesen:

Mikudagin 2. mars kl. 20
í Emmaus í Klaksvík
Evni: Spádómarnir um Ísrael – tey 4 stigini

Hósdagin 3. mars kl. 20
í missiónshúsinum á Glyvrum
Evni: Í Guds ætlan og hondum

Fríggjadagin 4. mars kl. 20
í missiónshúsinum á Sandi
Evni: Í Guds ætlan og hondum

Leygardagin 5. mars
Evnisdagur um Jóhannesar Opinbering
í Emmaus í Klaksvík
Kl. 15.00 Kaffi
Kl. 15.30 1. kap. Frágreiðing um bókina
Kl. 16.30 4. – 7. kap. Gud er í hásætinum
Kl. 18.00 Nátturði
Kl. 19.00 8. – 18. kap. Trongdir og sigur
Kl. 20.00 19. – 21. kap. Jesu afturkoma

Sunnudagin 6/3 kl. 18.00
í Tabor á Toftum
Evni: Spádómarnir um Ísrael – tey 4 stigini

Vælkomin til tiltøkini
Ísraelsmissiónin

Tríggjar vikur í tænastu í Ísrael

Ísraelstoymið, áður við Heimamissiónini sum sendara, nú við Ísraelsmissiónini, hevur tíggju ár á baki.

Fyrstu árini varð ítróttur brúktur fyri at skapa kontakt; fótbóltur, fimleikur, svimjing v.m. Eisini vórðu smá drama og ymiskir dansir, drama og dansir, ið onkursvegna vóru við at boða evangeliið, vístir á almennum støðum.

Kartin Høgnesen verið drúgvur
Nógvir ymiskir leiðarar hava verið knýttir at toyminum, men eingin so knáur sum Kartin Høgnesen. Okkurt hendinga árið undantikið, hevur leirvíkingurin verið við øll árini, annaðhvørt sum luttakari ella leiðari. Spurdur hvørt toymið, tess endamál og missión er broytt hesi árini, er hann skjótur at undirstrika, at endamálið enn sum áður er, at jødin verður náddur við evangeliinum, men at hátturin (missiónin) hevur flutt seg frá at vera ítróttarmissión + drama og dansur til í dag, burturav, at vera eitt tænastutoymi í meinigheitini Or HaCarmel í Isifya, Haifa.

Broytingin er hend so líðandi. Ymiskar lokalar kontaktir og samstarvsfelagar og góð ráð frá luttakarunum hava gjørt sítt til, at toymið hvørt ár hevur ment seg, bæði tá hugsað verður um tænastuna og fríðtíðina hjá toyminum, fríðtíð sum toymislimirnir forrestin sjálvi gjalda fyri.

Mentanarmunir ein avbjóðing
Ein avbjóðing, ið konseptið stuttíðarmissión javnan møtir er, at stutti steðgurin á missiónsmarkini, heldur enn at vera við til at lyfta og bera arbeiði hjá teimum lokalu, blívur til eyka upptøku, tá ið toymið er farið heimaftur. Týdningarmikið at mentanarmunir verða havdir í huga, tá ið farið verður í onnur lond at boða evangeliið. Nógvar misskiljingar og óhepnar støður eru íkomnar vegna onga ella vánaliga fyrireiking. Misskiljingar og støður, ið vórðu umgingnar, um toymið áðrenn fráferð gjørdi sær ómak betur at skilja mentan, fólk og fæ í landinum, ferðast var til.

Tæna teimum ið boða
Tíggju ár í Ísrael hava lært okkum eitt sindur. Heldur enn sum áður, tá ið toymið eisini sjálvt skipaði fyri møtum og evangeliseraði á gøtum Ísraels, hevur toymisleiðslan og Ísraelsmissiónini, valt at tæna samkomuni Or HaCarmel í Isifya, Haifa. Í meðan starvsfólkið og nakrir av íbúgvunum í kirkjubygninginum hjá Or HaCarmel, plaseraður á hægsta punkt Carmels, dagliga arbeiða við at boða evangeliið, so hevur toymið fingist við at skava gamla máling, spartlað, málað, ruddað, støvað av, vaskað, ansað børn v.m. Tað kann tykjast trivielt og spill av tíð og góðum kreftum, at ferðast góðar 4.000 km, at gera handaligar og sera praktiskar uppgávur, men lat tað vera sligið púra fast, enntá við sjey tumma seymi, at, vegna tað at vit, saman við øðrum toymum, árliga, veita eina hjálpandi hond í Or HaCarmel, so kunnu, David Davis og Peter Tsukahira, teir, ið í 1991 savnaðust um felags visiónina, at stovna eina meinigheit á Carmels fjalli, saman við konum sínum, betur hugsavna seg um arbeiðið í Or HaCarmel og tænastugreinar tess.

Ver vælkomin við!
Aftur í ár bjóðar Ísraelsmissiónin øllum áhugaðum at vera vælkomin at søkja um luttøku við Ísraelstoyminum 2016!
Eins og undanfarin ár, so fer toymið at gera praktiskar uppgávur í Or HaCarmel.

Leiðarar:
Anton Højgaard og Kartin Høgnesen

Tilmelding hjá:
anton@pl.fo 739313
ella
Kartinhognesen@gmail.com 743122

18 ára aldusmark

Tilmeldingar freist:
20. Februar

Fyribils skrá:
Ógviliga sannlíkt at skráin, bæði dagar og innihald, verður broytt.27.06.16
Fráferð Vágar – KBH
– Gist verður á Hotel Hebron

28.06.16
Fráferð KBH – Tel Aviv
– Koma væntandi til Ísraels seint seinnapart og ferðast til Migdal29.07.16 – 05.07.16
– Andaligt retreat í Beit Bracha, “house of Blessing”, bønar og retreat sentur í Migdal (Galileu).
– Góð og solid undirvísing. Føroyskir og ísraelskir undirvísarar. Spennandi, mennandi og viðkomandi undirvísing. Góður felagsskapur í einum stillum og kveikjandi umhvørvi.
– Útferðir til Genesaretssjógvin og møguligvís Jerúsalem, Deyðahavið, Masada v.m.
– Ætlanin er eisini at brúka tíð í umhvørvinum kring Migdal; ganga langar túrar og “útforska” ísraelsku náttúruna.

05.07.16 – 18.07.16
– Tænasta í Or HaCarmel

18.07.16 – 20.07.16
– toymið tekur sær av løttum

21.07.16
– Ferðast heim

Á bíbliuskeiði í Ísrael

Í tvær vikur í summar skipaði missiónshúsið Emmaus í Klaksvík saman við Ísraelsmissiónini fyri bíbliuskeiði í Ísrael. 27 fólk vóru í ferðalagnum og í besta veðri og nógvum hita lærdu vit meira úr Guds orði, eins og vit upplivdu og sóu nógv av Norðurísrael

Bíbliuskeiðið varð hildið í danska húsinum hjá Ordet & Israel, sum liggur við Genesaretvatnið. Húsið er í Poriya, tætt við Tiberias. Húsið verður brúkt sum bíbliuskúli hjá ungum dønum. Vit leigaðu húsið í tvær vikur í summar.

Bíbliutímar knýtt at støðum í Ísrael
Bíbliutímar vórðu hildnir dagliga. Tað vóru nakrir av luttakarunum, ið skiftust at hava bíbliutímarnar: Jóhan Henriksen, Atli Rasmussen, Frants Jensen og Silas Olofson. Flestu av bíbliutímunum vóru knýttir til onkra hending, ið gekk fyri seg í Ísrael.
Vit vóru eisini og vitjaðu fleiri støð í Ísrael, har evnið fyri bíbliutímarnar fór fram. Millum annað Genesaretvatnið, Sælufjallið, Kesarea Filippi, Kesarea við havið, Jerúsalem, Jeriko og Nazaret.
Umframt bíbliutímar høvdu vit eisini andaktir hvønn dag.
Í sambandi við nakrar av útferðunum var onkur av dønunum, sum starvast hjá Ordet & Israel, við okkum, og teir greiddu frá og høvdu andaktir út frá teimum ymisku bíbilsku støðunum, vit vitjaðu.
Aðrar dagar vóru vit sjálvi “guide”.

Hitamet
Á ferðini skiftust vit at gera mat. Vit leigaðu bilar, og koyrdu sjálvi runt í Ísrael. Á dagsferðunum til Jerúsalem og Jeriko leigaðu vit tó buss.
Vit vóru í Ísrael tvær tær fyrstu vikurnar í august. Hetta er heitasta tíðin á árinum. Meðan vit vóru har, var hitabylgja. Tann eina dagin varð nýtt met sett. Hesin dagurin var tann heitasti dagurin, ið nakrantíð er máldur í Ísrael. Hitin lá vanliga millum 35 til 45 hitastig um dagin. Vit máttu tí drekka nóg mikið av vatni, og vit gleddust um, at tað var vælvirkandi aircondition bæði í húsinum, har vit búðu, og í bilunum.

Vitnisburður frá Jenny
Vit vóru til messianska (kristna) gudstænastu í Tiberias, og vit høvdu eisini vitjan av messianskari kvinnu, Jenny, ið livandi greiddi frá sínum vitnisburði, hvussu hon var komin til trúgv á Jesus.
Jenny er jødi og uppvaksin í USA. Øll barnaár hennara sat pápin í fongsli, tí hann var dømdur fyri manndráp. Sjálv hevði hon fleiri diagnosur og segði seg vera trupla at hava við at gera. Nógv hendi í hennara lívi. Millum annað kom hon í samband við eina kvinnu, sum í fleiri ár bað fyri henni, at hon mátti koma til trúgv á Jesus.
Á eini ferð í Danmark kom hon til trúgv á Jesus. Hon flutti seinni til Ísrael, har hon hevur arbeitt nógv við trygdini hjá Ísrael. Hóast diagnosur, so er hon í dag væl útbúgvin og hevur bæði mastergrad og phd. Hon er partur av messianskari meinigheit, og tað liggur henna á hjarta, at aðrir jødar skulu koma til trúgv á Jesus. Hon heitir á kristin runt um í heiminum at biðja fyri Ísrael.

“Við Tórði á túri”
Tætt við Danska húsið er ein svimjihylur í eini kibbutz, sum var dúliga brúktur. Svomið varð eisini í Genesaretvatninum, í Deyðahavinum, í Miðalhavinum og í heitum keldum.
Fólk ymsastaðni úr Føroyum vóru við á ferðini. Ein av teimum var Tórður Mikkelsen, og hann gjørdi eina fína sending “Við Tórði á túri í Norðurísrael”, sum varð send í Kringvarpi Føroya í september. Til ber at hoyra sendingina á kvf.fo.

Orð: Frants Jensen
Myndaánari: Tórður Mikkelsen

Vælkomin til møtir og tiltøk við Christian Rasmussen

Hósdagin 5. mars kl. 19
Føstugudstænasta í Skálavíkar kirkju
Aftaná gudstænastuna greiðir hann í Kelduni frá aktuellu støðuni hjá kristnum í Ísrael

Fríggjadagin 6. mars kl. 20
Møti í missiónshúsinum í Miðvági
Evni: Guds orð til Guds fólk
Innsavnan

Leygardagin 7. mars
Evnisdagur í kirkjukjallarinum í Gøtu
kl. 15:00 Evnisdagur byrjar
Evni: Estrarbók 1 (Í febr/mars er purim hátíð í Ísrael. Ver við og lær meira um Ester og purim hátíðina)
kl. 16:30 Drekkamuður
kl. 17:00 Evni: Estrarbók 2 (framhald)
kl. 18:15 Nátturði
kl. 19:30 Møti.
Evni: Guds orð til Guds fólk
Innsavnan

Sunnudagur 8. mars
kl. 11:00 Gudstænasta í Argja kirkju
kl. 18:00 Møti í Meinigheitshúsinum á Skála Evni: Yom Kippur – framvegis aktuelt at tala um sáttargerð
Innsavnan
kl. 21:00 Ungdómsmøti í KFUM&K í Klaksvík
Evni: Yom Kippur – framvegis aktuelt at tala um sáttargerð

Christian Rasmussen hevur síðani 2009 verið prestur í Immanuelskirkjuni í Tel Aviv í Ísrael. Nógv virksemi er í kirkjuni, og harumframt brúka eini seks aðrar meinigheitir kirkjuna hvørja viku. Hóast har er nógv virksemi, so er bara eitt evarska lítið tal av fólkinum í Tel Aviv, sum trúgva á Jesus. Á øllum støðum, Christian vitjar í Føroyum, sigur hann frá arbeiðinum í orðum og myndum, og hvat verður gjørt fyri at náa út við gleðiboðskapinum í milliónabýnum Tel Aviv – eitt arbeiði, ið føroyska Ísraelsmissiónin eisini er við í. Og Gud virkar har.

Verið hjartaliga vælkomin!

Ísraelsmissiónin

Prestur hjá fólkum úr øllum heimspartum

– Her í Immanuelskirkjuni í Tel Aviv koma fólk ymsastaðni úr øllum heiminum at tilbiðja Harran. Bæði heimleys, rík, diplomatar, lesandi og onnur. Tað, ið bindur okkum saman, er Jesus, sigur Christian Rasmussen, ið hevur verið prestur í hesi kirkjuni síðani 2009.

Orð og mynd: Frants Jensen

Stutt frá staðnum, har Pætur á sinni fekk eina opinbering, meðan hann varð staddur á tekjuni í húsinum hjá Símuni garvaranum í Joppe (núverandi Jaffa), er Immanuelskirkjan í Tel Aviv. Hendan kirkjan, sum í síni tíð varð bygd av týskarum, hevur í 110 ár verið ein vitnisburður fyri jødum og øðrum fólkasløgum á leiðini, at boðskapurin um Jesus hevur ljóðað á hesum staði. Og enn í dag verður gleðiboðskapurin um Jesus boðaður á sama staði.

Minnir um og tó øðrvísi

– At vera prestur her í Immanuelskirkjuni minnir á mangan hátt um at vera prestur í eini danskari kirkju. Her eru tey kirkjuligu tiltøkini, og fólk, ið hava somu trupulleikar og avbjóðingar, sum í Danmark. Men tó, so er tað eisini nógv øðrvísi at vera her í mun til í Danmark. Tað er stórt at fáa loyvi at prædika gleðiboðskapin til jødar, hiðani gleðiboðskapurin av fyrstan tíð kom, og samstundis at prædika hann til nógv onnur fólkasløg, ið koma í kirkjuna – ja allir heimspartar eru umboðaðir í kirkjuliðnum. Á hvítusunnu vóru tað fólk við 28 ymiskum móðurmálum í kirkjuni. Sum prestur her í kirkjuni, fái eg loyvi til at hava umsjón við einum parti av Guds stóru familju, sigur Christian.

Fleiri vilja vita meira um Jesus

Í Jaffa, Tel Aviv og í Ísrael sum heild er tað bara ein lítil skari av fólkinum, ið trýr á Jesus. Men tað eru tó fleiri, ið eru søkjandi og ynskja at vita meira um Bíbliuna og Jesus.

– Tað eru fleiri, bæði jødar og ikki jødar, ið seta seg í samband við meg, og sum vilja vita meira um Jesus, og um hann nú er relevantur fyri tey. Nøkur hava eisini valt at lata seg doypa og taka við trúgv á Jesus. Tað er stórt at fáa loyvi at vera brúktur í hesi tænastuni, sigur Christian.

Ísraelsmissiónin hevur í fleiri ár verið við til at stuðla arbeiðið í Immanuelskirkjuni fíggjarliga og við bøn.

Opinberingin hjá Pæturi, at gleðiboðskapurin ikki bara skuldi prædikast fyri jødum, men eisini fyri heidningum (ikki jødum) er framvegis aktuelt á sama staði, har Pætur fekk opinberingina.

Mynd:

Christian Rasmussen úr Danmark hevur verið prestur í Immanuelskirkjuni í Tel Aviv síðani 2009. Hann er giftur við Lisbeth og tey eiga fýra børn.

Upplivdu at fólk tóku við trúgv á Jesus

Ísraeltoymið í ár upplivdi nakað, sum einki av undanfarnu Ísraelstoymum hevur upplivað. Nevnilig at toymið sá beinleiðis frukt av arbeiðinum við at ein heil familja tók við trúgv á Jesus.

Hóast ófrið í Suðurísrael og Gaza, so upplivdi tey 15 í Ísraelstoyminum næstan einki til ófriðin nú tey hava verið í tríggjar vikur í Ísrael.

Ófriðurin byrjaði annars tveir dagar áðrenn toymið fór avstað. Greitt varð frá støðuni, og nógv varð tosað aftur og fram um toymið skuldi fara ella ikki. Fólk hevði eisini møguleika at setast aftur, men øll valdu at fara.

Tað ógvusligasta vóru nakrir fuglar

Á ferðini gjørdi toymið nakrar broytingar í skránna, fyri ikki at fara í støð, har størri vandi var fyri at fleiri rakettir fóru at verða skotnar yvir. Samstundis varð nógv biðið – bæði í toyminum og heima í Føroyum. Og bønirnar vórðu hoyrdar.

– Vit kendu okkum trygg allatíðina og vit kendu, at Gud var við okkum. Vit fingu eisini loyvi at uppliva tað mesta av tí, sum ætlanin var, at vit skuldu uppliva, sigur Frants Jensen, toymisleiðari á ferðini.

Tað ógvusligasta, toymið upplivdi, var á heimferðini, tá ið flogið varð frá Keypmannahavn til Føroyar. Tá rendi flogfarið í nakrar fuglar, og neyðugt varð at venda við til Keypmannahavn. Umleið fýra tímar seinni slapp toymið saman við øðrum ferðafólkum aftur til Føroyar við einum øðrum flogfari.

Gjørdu praktiskt arbeiði í kirkjuni

Fyrstu seks dagarnar ferðaðist toymið runt í Ísrael og sá tey kendu bíbilsku støðini. Millum annað var toymið í Jerúsalem, við Deyðahavið, í Tiberias og í Nasaret.

Síðani varð farið til Isifiya, ið liggur tætt við Haifa í Norðurísrael. Har varð arbeitt saman við kirkjuni, ið arbeitt hevur verið saman við í fleiri ár.

Uppgávurnar har vóru tó nakað øðrvísi enn undanfarin ár. Fyrr hevur verið vanligt at vera við til barnalegu, men hesaferð var eingin barnalega. Í staðin hjálpti toymið við ymiskum praktiskum uppgávum í kirkjuni og arbeiðinum har. Millum annað arbeiddi toymið við at gera mat, vaska, mála sabbat-skúlan, hava sabbat-skúla, ansa eftir børnum, og hjálpa limum í kirkjuni, sum vóru í gongd við at flyta.
Fyrstu seks dagarnar ferðaðist toymið runt í Ísrael og sá tey kendu bíbilsku støðini. Millum annað var toymið í Jerúsalem, við Deyðahavið, í Tiberias og í Nasaret. Síðani varð farið til Isifiya, ið liggur tætt við Haifa í Norðurísrael. Har varð arbeitt saman við kirkjuni, ið arbeitt hevur verið saman við í fleiri ár. Uppgávurnar har vóru tó nakað øðrvísi enn undanfarin ár. Fyrr hevur verið vanligt at vera við til barnalegu, men hesaferð var eingin barnalega. Í staðin hjálpti toymið við ymiskum praktiskum uppgávum í kirkjuni og arbeiðinum har. Millum annað arbeiddi toymið við at gera mat, vaska, mála sabbat-skúlan, hava sabbat-skúla, ansa eftir børnum, og hjálpa limum í kirkjuni, sum vóru í gongd við at flyta.

Ein familja frelst

Umframt at gera ymiskt praktiskt arbeiði, var toymið eisini á strondini í Haifa og evangeliseraði, og tað eina kvøldið var toymið eisini og sang á eini kaffistovu í býnum. Har hendi tað stóra, at eigarin av kaffistovuni ynskti at taka við trúgv á Jesus.

– Tað er sera stórt av vera vitni til, at eitt menniskja tekur við trúgv á Jesus. At tað so hendir í Ísrael, har annars ikki nógv trúgva á Jesus, er sera stórt. Hetta er tað, sum vit í Ísraelsmissiónini og onnur eisini hava biðið nógv um, og eg taki hetta sum svar upp á bønir, sigur Frants.

Men ikki nokk við at uppliva at eigari av kaffistovuni, kom til trúgv. Hendan konan bjóðaði øllum toyminum heim til sín í Nasaret, og nakrar dagar seinni sat alt toymið heima hjá hesi familjuni, har tað varð sungið, biðið og lisið úr Guds orði. Maðurin og trý av børnunum tóku eisini við trúgv á Jesus. Ein stór uppliving.

Andaliga styrkt

Sum vanligt varð ísraelska mamman, Ronit, við á ferðini í Ísrael, og hon gjørdi eitt sera gott arbeiði, so at øll skuldu kenna seg væl á ferðini. Og ikki minst var hon ein fyrimynd sum ein, ið fylgir Jesusi.

Andaliga varð ferðin eisini sera góð, og toymislimir vórðu endurnýggjaðir og styrktir í trúnni. Eftir at toymið hevði verið í næstan tvær vikur í Isifiya, endaði ferðin í Tel Aviv, áðrenn komið varð heimaftur.

Ein hendingarrík toymisferð, sum Gud signaði so ríkiliga.

Mynd:

Ísraelstoymið 2014 á Oljufjallinum í Jerúsalem.

Ultraortodoks nú eisini í herin

12. mars samtykti Knesset eina nýggja lóg, sum krevur, at eisini teir flestu ultraortodoksu jødarnir nú skulu tæna í Ísraelska herinum.

Tey komandi árini fara tey ultraortodoksu so við og við at verða kalla inn í herin. Í 2018 er lógin fult út er komin í gildi.

Tað var David Ben Gurion, sum í 1948 gjørdi hesa serligu lógina, at rabinarar skuldu fáa loyvi at brúka tíð til bøn og lestnað, og at landið skuldi rinda fyri tað.

Hetta var serliga vegna, at eftir seinna heimsbardaga vóru bara nakrir fáir hundrað rabinarar eftir á lívi. Men í dag eru hesir fáu hundrað vorðnir til nógvir hundraðtúsund, sum hvørki arbeiða ella gera hernaðartænastu. Teir sekuleru jødarnir hava í fleiri ár verið sera misnøgdir við hendan mismunin av borgarunum í landinum.

Fáar dagar fyri avgerðina í Knesset, mótmæltu fleiri hundraðtúsund ultraortodoksir jødar lógaruppskotinum.

2013 metár fyri ferðafólk í Ísrael

Tilsamans vitjaðu 3,5 milliónir ferðafólk í Ísrael í 2013. Tað er ein framgongd upp á eitt hálvt prosent í mun til 2012 og er tað mesta av ferðafólkum, sum hava verið í Ísrael í einum ári.

Sambært Ynet News vóru 53 prosent av ferðafólkunum kristin og 28 prosent jødar. Av teimum kristnu vóru 47 prosent katolikkar.

Ein greining vísir eisini, at 54 prosent av ferðafólkunum ongantíð høvdu verið í Ísrael fyrr. Spurd, hví tey komu til Ísrael, svaraðu 27 prosent, at tað var fyri at síggja kend støð í landinum. Onnur 22 prosent søgdu, at tey vóru á pílagrímsferð.

Flestu ferðafólkini í Ísrael í 2013 vóru amerikanarar – 623.000. Tey russisku ferðafólkini vóru 603.000 í tali, og 315.000 vóru úr Fraklandi. Síðani komu Týskland, Bretland, Italia, Ukraina, Pólland, Kanada og Niðurlond.

(Kelda: standby.dk)

Myndatekstur:

Nógv ferðafólk vitja í kendu føðikirkjuni í Betlehem. Hetta er frá vitjan hjá Ísraelstoyminum 2013.

Sera nógv fólk í kirkju eitt vikuskifti

Til dagligt er tað bara eit lítið tal av grannunum hjá Immanuelskirkjuni í Tel Aviv, ið koma í kirkjuna, men 23. og 24. mai tystu tey innar í kirkjuna.

Orð og myndir:

Frants Jensen

Hetta vikuskifti hevði kirkjan eins og ein rúgva av øðrum áhugafelagsskapum og stovnum í Tel Aviv opið hús, og fólk allastaðni frá komu fyri at fáa meir at vita um, hvat gongur fyri seg í kirkjuni.

Hvønn heilan tíma var ein stutt prædika, sálmasangur og frágreiðing um kirkjuna. Fólk sluppu eisini at hoyra urguna – eitt ljóðføri, ið lítið verður brúkt í Ísrael, og tí ógvuliga forkunnugt. Uttanfyri var bókaborð og høvið varð eisini at práta við fólk frá kirkjuliðnum.

Tilsamans vóru 1665 fólk og vitjaðu kirkjuna til hetta tiltakið. Harafturat var kirkjukonsert um kvøldið, og tá var aftur fult í kirkjuni.

Aðrar kirkjur misunna okkara støðu

Tað er tó ikki bara hetta eina vikuskifti um árið, at nógv fólk vitja Immanuelskirkjuna. Fýra dagar um vikuna er kirkjan eisini opin og fleiri einstaklingar og bólkar koma inn í vøkru kirkjuna og fáa har eina frágreiðing um arbeiðið í kirkjuni.

– Í fleiri kirkjum og meinigheitum í Ísrael verður tosað nógv um at fara út á gøtuna fyri at fáa samband við fólkið og boða teimum gleðiboðskapin. Aðrar kirkjur misunna støðuna hjá okkum, tí her koma allatíðina fremmand fólk, sum vit hava høvi at boða gleðiboðskapin, sigur Christian Rasmussen, prestur.

Nógv virksemi

Umframt gudstænastur leygardag og sunnudag er nógv annað virksemi í kirkjuni. Millum annað bíbliutímar, bøn, ungdómsbólkur, kvinnubólkur, sabbatsskúli (sunnudagsskúli), diakonalt arbeiði, konsertir, opin kirkja, samstarv um ymisk tiltøk við aðrar kirkjur, kirkjan gevur mat út til fáttøk, ger eitt arbeiði millum flóttarfólk og Immanuelskirkjan er eisini tann fyrsta, sum kemur fram, tá ið ein leitar eftir eini kirkju í Tel Aviv á Google.

Seks aðrar kirkjur leiga eisini kirkju- og meinigheitshølini hjá Immanuelskirkjuni til teirra tiltøk í vikuni. Tað merkir, at tað altíð er nógv virksemi í kirkjuni og meinigheitshølinum við síðuna av.

Her á síðuni er mynd frá 24. mai, tá ið tað var opin kirkja.

Nýtt og breiðari samstarv í Tel Aviv

Síðani 1997 hevur tað verið eitt norðurlendskt samstarv um arbeiðið í Immanuelskirkjuni í Tel Aviv, nevnt Joint Mission in Israel (JMI). Nú verður arbeitt við at víðka um samstarvið og eisini at fáa lokalar missiónsfelagsskapir í Tel Aviv við í arbeiðið.

Orð: Frants Jensen

22. mai hevði stýrið fyri JMI fund í Immanuelskirkjuni í Tel Aviv. Í stýrinum hava verið umboð fyri Ísraelsmissiónsfelagsskapir í Norra, Danmark, Svøríki, Finnlandi og Føroyum. Yvirritaði umboðaði Føroyar.

Nú er stýrið komið til tað støðu, at rætt er at víðka um hetta samstarvið. Tí vóru umboð fyri Jews for Jesus (Jødar fyri Jesus) í Ísrael og Bíbliufelagið í Ísrael eisini boðin við á fundin. Harafturat var eisini ein týskur Ísraelsmissiónsfelagsskapur boðin við.

Missiónsfelagsskapurin FELM úr Finnlandi, ið hevur verið við síðani byrjan, er ikki við longur. Hetta er orsaka av, at teir hava broytt teologiska áskoðan og hava sent eitt samkynt par út sum trúboðarar.

Nógvir fundir og skriv hava verið aftur og fram um hetta í stýrinum, og tað er endað við, at teir hava tikið seg úr samstarvinum. Stýrið hevur ístaðin heitt á ein annan finskan missiónsfelagsskap FLOM um at koma við, og umboð frá teimum vóru við á fundinum.

Møguleiki at vera volontørur

Fundurin var sera jaligur, og nógv hugskot vóru frammi, hvussu arbeiðið kann vera í framtíðini. Arbeitt verður nú við at fáa tær formellu avtalurnar upp á pláss.

Føroyska Ísraelsmissiónin hevur hesi síðstu árini stuðlað arbeiðinum í Immanuelskirkjuni við 25.000 krónum árliga.

Nakrir føroyingar hava eisini verið volontørar í Immanuelskirkjuni í styttri tíðarskeið. Tørvur er framvegis á volontørum, og vilja vit heita á teg, sum lesur hetta, um at umhugsa henda møguleikan og bjóða teg fram at vera volontør í Immanuelskirkjuni. Seg teg so í samband við Ísraelsmissiónina.

Mynd:

Umboð fyri stýrið fyri Joint Mission in Israel og møguligir nýggjar samstarvspartnarar á fundi í Tel Aviv. Umboðini eru úr Danmark, Norra, Finnlandi, Týsklandi, Ísrael og Føroyum.