Kanna Auschwitz umaftur

Myndugleikarnir í Póllandi hava gjørt av at kanna brotsverkini í týningarleguni Auschwitz, har umleið ein millión fólk, tey flesu jødar og póllendingar, lótu lív.

Hetta er ikki tann fyrsta kanningin av hesum slagnum, men myndugleikarnir siga við BBC, at hon er neyðug fyri at fáa staðfest, um nakar av teimum nazistisku brotsmonnunum, sum høvdu ábyrgd í leguni, gongur leysur.

Auschwitz var bara ein av teimum nazistisku týningarlegunum í Póllandi, men tað er ikki greitt, um teir polsku myndugleikarnir ætla sær at kanna eitt nú Treblinka, Sobibor, Chelmno ella Belzec av nýggjum.

Tann seinasti nazistiski brotsmaðurin, sum varð ákærdur og dømdur í Póllandi, var Henryk Mania. Í 2001 fekk hann átta ára fongsul fyri fólkamorð í Chelmno-týningarleguni.

Kelda: aktuelt.fo
Onnur tíðindi